Lo setmanièr occitan

Hestivòc 2017, los mèdias occitans e lo hestiv'OFF

Lo rendetz-ve culturau de l'estiu que s'aprèssa. Hestiv'òc que s'installarà a Pau deu 18 au 20 d'agost dab concèrts, estanquets, danças, teatre, fanfaras, espectacles e cantas. 
Lo 17 d'agost, un dia de pre-obertura qu'ei organizat. Michel Feltin-Palas, jornalista a L'Express, especialista de las regions francesas que harà ua conferéncia sus « L'accent, enjòc de poder » au Pavillon de las Arts a comptar de 11 ò 30. Ua causa qui non cambia pas, qu'ei la projeccion a l'airejada deu dessenh animat « Paddington » au barri deu Hedàs e difusat en lenga nosta a 21 ò 30. 

Los mèdias occitans e lo Hestiv'OFF

La serada abans purmèra deu hestenau, dijaus, que serà assegurada peus mèdias de la FIMOC (Federacion Interregionau deus Medias Occitans), Ràdio Auloron e Ràdio País. Los mèdias occitans que seràn un còp mei sus plaça entà cobrir l'eveniment paulin de compte har dab un Hestiv'OFF. Augan, lo tribalh de la FIMOC que serà integrat dens la programacion deu hestenau. Los professionaus deus mèdias, los tecnicians, un platèu ràdio e un empont OFF que s'installaràn com l'an passat a l'estanquet lo Ska Café (1 baloard d'Aragon). Concèrts, entervistas e emissions retransmetudas en dirècte sus un detzenat de ràdios d'Occitania. La Setmana que harà partida deus mèdias presents suu hestenau OFF.

Dijaus, ua emission en dirècte de 18 ò a 21 ò que serà perpausada davant lo public, on un apero cantèra e serà animat peus grops de polifonias pirenencas Maishanta Lenga, Simple Tres (musica trad, grop bearnés) e Duo Eydelon (electro-folk dab lo condaire e musicaire Florant Mercadier), dab las intervencions de benevòles e organizators deu hestenau e deus artistas programats au hestenau. Deu divès au dimenge, ua emission ràdio de 11 ò a 13 ò e ua dusau de 16 ò a 17 ò que seràn difusadas en dirècte. Dimenge de 17 ò 30 enlà, Didier Tousis, artista landés que perpausarà lo son darrèr espectacle a l'entorn deu son àlbum « Guiva Roi ». 

Divés ser, un còr de 1000 cantaires qu'obriràn oficiaument la navèra edicion d'Hestiv'Òc a l'estadi Philippe Tissié (nautat). Qu'ei lo grop gascon Laüsa qui obrirà lo bal en musica suu gran empont a 19 ò 45. Que v'auheriràn un viatge musicau enter tradicion eretada e imaginada, un son a l'encòp tradicionau e actuau. 

L'electro tribau deu grop Uèi que harà vibrar lo còr deus hestenalèrs. Puish qu'arribaràn los Papa Gahús, qui's disen los « artisans deu ròck bigordan ». Que presentaràn las cantas deu lor dusau àlbum qui demora dens la vena deu ròck etnic qui mescla riffs de guitarra e votz de personas gessidas de l'operacion de collectatge deu patrimòni miada per las associacions Nosauts de Bigòrra e Eth Ostau Comengés

Dissabte 19 d'agost, los Bearnés d'Artús que pujaràn sus l'empont dab lo lor son ròck alternatiu occitan. Du Bartàs que jogaràn dimenge en barrada d'aquera edicion. Lo còr poderós de 4 votz qu'altèrna enter presas de paraula intimas e coloradas, au ritme de percussions maridadas au timbre calurós deu cuatro, deu oud, de l'acordeon e deu vriolon orientau. 

Com cada annada, Hestiv'Òc que perpausa aus mainatges divèrs talhèrs, condes, jòcs bearnés, iniciacion a instruments tradicionaus, vrespèr, etc. 

Inf. : Associacion Accents du Sud — Tel. : 05 59 90 34 94 — Corric : contact@hestivoc.com. 

Didier Fois, gavidaire d'Accents du Sud, qu'expliquè çò que poderé miar lo cambiament de lòc deu hestenau a l'Estadi Tissié, e que parla deu son còp de còr musicau, au micrò de Joan-Nadau Commères de Ràdio País : 


Écrit par La Setmana le vendredi juillet 7, 2017
Category: news - Tags: hestivoc, fimoc, pau, cultura

« La crisi de l'Occitanisme politic, segon Alan Sibé - Lo Cercle Occitan de Narbona animèt lo Total Festum »