Lo setmanièr occitan

Gironda : los bons afars de Dassault

Las usinas Dassault situadas en Gironda riscan d’aver de qué téisser. Lo 13 de mai, lo PDG Éric Trappier anoncièt als confraires de Sud Ouest que de convèrsas èran en cors per fabricar al mens un cinquantenat d’aparelhs de combat suplementaris a destinacion d’Índia.

Segon çò indicat pel sénher Trappier, i a ja de previstas las liurasons de 36 Rafale per Índia (per un contracte precedent), 24 per Egipte e 24 pel Qatar. A tanben parlat d’un « quatren contracte a l’estrangièr » per 2018. Dassault es en negociacions amb Malàisia per 18 avions e amb Índia per un segond contracte. « Los besonhs en Índia son immenses, çò a dit lo sénher Trappier a Sud Ouest, Atal per la marina, es question de comandar 57 avions. (...) Asia serà estrategica per nosautres dins las annadas venentas, especialament Índia ». Es un brave revenge per l’avionaire que capitava pas a exportar sos aparelhs e sovent se deviá contentar de las comandas de l’armada francesa.

L’obertura cap al mercat malaisian se poguèt far mercés a una visita del president sortent François Hollande al mes de març. Lo primièr ministre de Malàisia aviá fait part de son interès per 18 aparelhs de combat Rafale per un amont de dos miliards d’euros.


Écrit par La Setmana le mardi mai 30, 2017
Category: news - Tags: Gironda, avion, dassault, usina, enterpresa, india

« Ensenhament bilingüe — Acamp d'informacion a Moissac (82) - Forom de las Lengas (31) — Palanca enter las lengas deu monde sancèr »