Lo setmanièr occitan

Forom de las Lengas (31) — Palanca enter las lengas deu monde sancèr

Dimenge passat que's podó enténer un centenat de lengas deu monde parladas sus la plaça deu Capitòli a Tolosa. Que's debanè la 25au edicion deu Forom de las Lengas. Au programa, espectacles de danças, de cantas, mes tanben debats e mustras tot au long deu dia. 

Los curiós que podón anar de taulèr en taulèr, apréner mots en bambara (Mali) o en shikomori (Comòras) espiar danças tradicionaus malgachas, indianas o enqüèra bulgaras. Lo vrèspe, l'ensenhament de las lengas africanas e indianas dab enter aute, Georges Daniel Véronique, universitari especialista de las sciéncias deu lengatge, tanben subjèctes com lo latin e la question de las lengas regionaus qu'estón debatuts. 

                                         

Lo Tolosan Franck G. qu'èra sus plaça au Forom. Que'ns descrivó çò qui retienó la soa atencion qu'estó la multiplicitat de las activitats perpausadas : « Lo monde qui tienèvan taulèrs ne's contentavan pas sonque de presentar las lors lengas dab cors e diccionaris, mes tanben activitats popularas dens los lors país on la lor lenga ei parlada (exemple iniciacion a la calligrafia suu taulèr deu mandarin). Benevòles d'associacions umanitàrias qu'èran presents tanben e que podoi escambiar dab uns d'enter eths, lo taulèr de la Guinèa per exemple, entà conéisher las lors causas e perqué tribalhan ». 

L'eveniment qu'estó aviat per Claude Sicre deus Fabulous Trobadors e lo carrefor culturau d'Arnaud bernard en 1992.

                                         


Écrit par La Setmana le mardi mai 30, 2017
Category: news - Tags: forom, tolosa, capitoli, cultura, monde, occitan, sicre, fabulous, tradicion, diccionari

« Gironda : los bons afars de Dassault - Cronica Curiós de Santat - Los plan·hèits de l’aleitada »