Lo setmanièr occitan

Europeada 2016 : doas finalas « raubadas » segon los Occitans !

Malgrat las desfaitas en finala de las doas seleccions, es l'arbitratge « local » qu'auriá plan ajudat lors adversaris del Sud-Tiròl a o emportar. 

A l'eissida dels rencontres finals de l'Europeada, lo president de l'AOF Nicolas Desachy aguèt pas de mots pro durs per qualificar l'actitud dels organisaires (e ganhants) d'aquela Europeada 2016. Una « gròssa escrocariá », çò podiam legir dins un article de 20 minutes. Semblariá doncas que las delegacions masculina e femenina del Sud-Tiròl aurián beneficiat d'un arbitratge mai que « favorable ». Segon lo jornalista Nicolas Stival, que seguiguèt l'aventura dels sang e aur, mantunas delegacions an preferit aplaudir los « finalistas » puslèu que los « venceires ». Aquesta situacion a tanben profeitat als quites Occitans puèi qu'en mièja-finala, los adversaris de la còla dels Croatas de Serbia son partits del pelenc a la 36ena minuta per protestar contra un penalty e doas expulsions que jutgèron injustas. 

Se i aguèt Sevilha 1982 per la còla de França, i aurà l'Europeada 2016 pels Occitans. Didier Amiel, seleccionaire de la còla masculina, fulmina quand espia sas nòtas de match. De costuma, bastan doas fuèlhas grand maximum. Mas per aqueste rencontre, ne calguèt sèt per compilar, minuta per minuta, totes los faits marcants del rencontre. Aquò va de la « fauta imaginària » a d'« agressions non sanccionadas » en passant per « d'expulsions injustas ». L'ambient èra mai que tibat. Didier Amiel quitava pas de cridar « Ladri ! Ladri ! » (raubaires !) als arbitres. « Baissavan lo cap, gausavan pas respondre, çò nos a dit, se respondián, èra la bagarra generala ! ». 

Òm a de mal a i creire quand òm escota las « minutas » del match redigidas pel seleccionaire de la còla masculina. Exemple : 98ena minuta, but del cap dels Occitans. Los Sud-Tirolians semblan d'encaissar la causa mas lo jutge de tòca leva lo drapèl per un fòra-jòc mai qu'ipotetic. Un pauc mai tard, un jogaire sud-tirolian, passat per un jogaire occitan, o fa tombar per un gèst semblant un placatge. Sanccion : un carton jaune, es tot. A la 129ena minuta, un Occitan es victima d'una « agression », cap de sanccion. En esperant, lo jogaire patís ara d'una fractura dobèrta e dintrèt a l'ostal amb la camba emplastrada. « Farai una letra a la FUEN per que fagan quicòm, moralament, çò nos a dit Didier Amiel, lor demandarai de nos reconéisser coma co-campions de l'Europeada. Me pensi qu'o faràn pas. Lo problèma per eles, es que se de monde de la FIFA son assabentats d'aquela situacion, poiriá ordenar a sos jogaires licenciats dins de clubs de non pas se rendre a aquelas competicions. Aquò s'arrestariá net ! »

Qué que ne siá, lo president Nicolas Desachy indiquèt al jornalista de 20 minutes que soscarián a lor participacion eventuala a l'edicion venenta. Çò segur es que, coma a cada competicion a la quala participan, los Occitans se fan embaissadors de la nòstra cultura. « Quand arribam, degun sap pas çò qu'es Occitània, çò nos a dit Didier Amiel, quand partissèm, tot lo monde o sap ! »

Clamenç Pech 

Inf. : en bonus, l'entrevista de Didier Amiel realisada pels confraires de Ràdio País. 

 

 

 

 


Écrit par La Setmana le lundi juin 27, 2016
Category: news - Tags: Espòrt, Fotbòl, Europeada, AOF

« 22 & 23 / 09 : Lo programa deu hestau Planvengut en linha ! - Pertrèit : Mario Peperoni, viatja enter las culturas »