Lo setmanièr occitan

Erau : Operacion BioHut a Marselhan

La societat "Ecocéan" basada a Montpelhièr prepausa de solucions per salvar la biodiversitat marina. A installat de casièrs per albergar de peisses dins onze pòrts occitans de Mediterranèa, dont Marselhan.

« Ecocéan » monta de projèctes dins lo mond tot per assegurar un gestion durabla dels oceans. 
Aquela societat a aviada l'operacion « BioHut » a Marselhan-Plaja (Erau). L'operacion consistis en installar de casièrs per ensajar d'abarir de peisses « post-larvaris » e de tornar crear lor ambient  natural.  Aquelas « BioHut » son un biais de remplaçar los fons rocassoses e sabloses que foguèron destrusits per la construccion d'amainatjaments  costièrs. La destruccion d'aqueles environaments naturals pròches dels ribatges es l'encausa d'una baissa de las populacions adultas, las BioHut restablisson un cicle natural.

Lo 16 de Mars, un segond contracte foguèt signat per la societat amb l'objectiu d'installar de novèls casièrs per quatre ans. Aquel novèl contracte mòstra lo bon foncionament de l'operacion dempuèi la debuta de l'experiéncia fa tres ans. L'objectiu es primièrament de conservar la biodiversitat e de desvolopar lo nombre de peisses a Marselhan e far créisser lo taus de subrevivéncia. 

L'operacion BioHut foguèt la solucion causida per onze pòrts de Mediterranèa. Sus las ribas occitanas, se faguèt en 2016 a Carnon, a Vendres, al Cap d'Agde, Bosigas e Antíbol. 
La societat Ecocéan basada a Montpelhièr foguèt creada en 2003 per Sven Michel Lourié e Gilles Lecaillon.

Thibaut Menou


Écrit par La Setmana le lundi mars 20, 2017
Category: news - Tags: Environament, BioHut, Marselhan, Erau

« Lemòtges (87) : Autoras occitanas au salon deu libe - AUDIO — La Setmana a Ràdio País »