Lo setmanièr occitan

Ensenhament : los vòstres escolans sul camin de Febus ?

Se d'ensenhaires d'occitan an de dificultats a organizar de projèctes pedagogics l'an que ven, lor collèga ariegesa Muriel Batbie-Castel a decidit de lor facilitar lo trabalh. 

Arriba lo periòde fatidic. Es la debuta del tresen trimèstre quand lo cap d'establiment demanda se i a de projèctes pedagogics a far finançar per l'an que ven, per lo far votar en Conselh d'Administracion. Los ensenhaires d'occitan, sovent sus mantuns establiments, an pas forçadament lo temps d'i pensar entre dos bulletins trimestrials a emplenar. Quand s'agís de far un viatge escolar, lo cal budgetizar, ferralhar per aver las autorizacions necitas e subretot... Trobar los contactes utils del lòc qu'òm vòl far visitar.

L'ariegesa Muriel Batbie-Castel, ensenhaira a Foish, a agut l'idèa de mutualizar de contactes de personas moralas o fisicas susceptiblas de poder ajudar d'eventuals projèctes. Dins la mesura que Foish es una de las ancianas possessions de l'ostal de Bearn, prepausa un viatge tematic claus en man « sul camin de Gaston Febus ». S'agís de menar los escolans de Foish a Ortès en passant per las ancianas fortalesas de Montaner e Morlana. « Mancam sovent d'una vision globala de çò que podèm far, çò nos a dit, prepausi tot simplament als collègas de ganhar de temps ».

Los ensenhaires qu'an d'idèas de circuits (e los contactes que van amb) las pòdon tanben partejar sus un grop Facebook titolat « visitas pedagogicas en occitan ». En mai d'aquela caminada dins los passes del Prince dels Pirenèus, Muriel Batbie-Castel elabòra un autre viatge dins los passes d'una autra cara emblematica : Frederic Mistral. 

Inf. : per contactar Muriel Batbie Castel sul viatge tematic "sul camin de Febus" : mbatbiecastell@gmail.com 

 

  


Écrit par La Setmana le vendredi mars 31, 2017
Category: news - Tags: Patrimòni, Ensenhament, Febus

« Cronica D'una illa a l'autra — Las illas Salomon, prat batalhièr de la segonda guèrra mondiala - AUDIO — La Setmana a Ràdio País »