Lo setmanièr occitan

Ensenhament : l'agregacion d'occitan es nascuda !

Ven de paréisser al bulletin oficial de l'educacion nacionala. 

La Federacion dels Ensenhaires de Lenga e de Cultura d'òc ven d'anonciar la naissença oficiala de l'agregacion Occitan-Lenga d'Òc còsta d'autras lengas (basc, breton, catalan, còrse, creòl, taïcian). Segon las indicas de la FELCO, la maqueta dels ensenhaments prevei una espròva comuna en francés sus un subjecte d’istòria o de sociolinguistica, e d'espròvas per opcion (per lenga), d'espròvas « classicas » (dissertacion, traduccion, leiçon, etc.), amb un programa per cada opcion. La FELCO espèra ça que la de veire cossí s'organiza la jurada « en ligason, o pas, amb las juradas del CAPES ».

Aquela naissença es l'abotiment d'annadas de trabalh acarnassit de las associacions en ligason amb l'ensenhament de las lengas ditas regionalas. S'agissiá de far reconéisser « lo drech pels ensenhaires de lengas regionalas d'aver de perspectivas de carrièras egalas a las de sos collègas d'autras disciplinas ».

Lo ministèri i faguèt allusion un primièr còp al mes d'octobre de 2016 quand lo president de la FELCO Yann Lespoux recebèt una letra de la quita ministra, en responsa a de nombrosas interrogacions. I aviá primièr la de la convencion-quadre entre l'OPLO e las acadèmias de las Regions Novèla-Aquitània e Occitània / Pirenèus-Mediterranèa signada en genièr (sens objectius chifrats). Per çò qu'es de l'agregacion, la ministra indiquèt alara qu'aviá demandat a l'Inspeccion generala de l'Educacion nacionala atal coma a la Direccion generala de las ressorsas umanas d'integrar la lenga occitana dins las diferentas mencions que comprendrà l'agregacion en lengas ditas regionalas. 

 

 

 

 


Écrit par La Setmana le jeudi mars 23, 2017
Category: news - Tags: Ensenhament, Occitan, Agregacion

« Lo PS e las Lanas de dòu - Tolosa, tretzena vila verda de França. »