Lo setmanièr occitan

Editorial — Las vacanças, totun !

N’i a per pensar que las vacanças son l’alfà e l’omegà deu ensenhaires... Vertat que i èm a dus dits. E donc, deisharem, los collègas (e jo), tot en pialòt suu burèu lo 7 de julhet per i tornar sonque lo 1er de seteme ? N’i a qui l’an saunejat, n’i a qui lo fantasman, n’i a qui regretan... Mès viste vist, digun viu pas dab ua reganta o un regent de mairala ? Passar l’estiu a talhucar cartonets, recaptar causas impossiblas (deu plastic de color au papèr lusent, deus bastonets de glaças a las boètas de totas tracas, de la grana de semoar au herumi d’eslevar o au carnús d’espepissar). Mei seriósa, en semblar, la regenta o lo regent d’elementari qui passa l’estiu lo nas au vent o l’aurelha a l’argüeit tà trobar pistas tà renovelar las practicas de classa. E los professors de collègis qui an passat ua annada d’insecuritat dab la refòrma e qui van descobrir benlèu un navèth fonccionament a la dintrada qui facilitarà tà l’occitan ? Arren n’ei pas segur, e sovent los calerà tornar botar a jorn lo GPS per anar au mei viste d’un collègi au licèu en minjar l’entrepan dins l’autò, en esvitar la contra-dança valedèra desempuish lo 1er de julhet.Vertat ei que passar las vacanças dab los sons dròlles qu’ei ua riquèssa e un plaser (çaquelà vòu díser passar tanben las vacanças dab los dròlles deus autes per cambiar de l’annada). Mès, i a ua question qui poiré picar las aurelhas pendent l’estiu : qui va hèr musica lo jorn de la dintrada coma ac demanda lo ministre : la banda « Los Peniblos » qui van vénguer tutar la Pitxuri o Paquito ? La corala deu canton qui va vénguer amasar las huelhas a la pala ? Los joens qui ensajan de hèr rap ? La musica deu 14au RPIMA per ua version sense « groove » d’ua cançon deu Johnny ? E tot açò dins las 15 prumèras minutas de la dintrada tà balhar un ambient patziu en aqueth moment tan importent que cada regent sap qu’ua partida de l’annada s’i va jogar dessús e qu’aurà de plorar après tà trobar 3 euros lo rèsta de l’annada per àver ua vita culturala reala taus escolans... Anem, rai, divés au ser que seran los congèts taus ensenhaires e las vacanças taus escolans... e ua huelha de mensh au calendàri.

Joan-Miquèu Espinasse


Écrit par La Setmana le lundi juillet 10, 2017
Category: news - Tags: espinasse, editorial, setmana, ensenhament

« Tè Vé Òc, una television que pòrta ben son nom - La crisi de l'Occitanisme politic, segon Alan Sibé »