Lo setmanièr occitan

Editorial — La geografia e lo president

Lo president estatsunidenc qu’es un adèpte deus bresilhadís – tweet en francés – suu son telefonet intelligent – smartphone en francés – entà har conéisher a sos amics electoraus e au planeta las vilanias deus sons enemics a son encontra e çò qu’a hèit desempuish la soa eleccion tà tornar har « America great again » après la politica catastrofica deu son predecessor. Benlèu que considèra aquesta setmana cargada enter l’Orient pròche, Brussèlas e Itàlia com ua pausa salutària e mei reconfortanta que totas aqueras misèrias que’u hèn at home ! Se ne credi los confrairs qui segueishen los tribulòcis d’aqueth president imprevisible, tot que pòt arribar quitament lo melhor ! La soa doctrina qu’es com eth : primària ! E la soa dòxa qu’es simpla : los drets de l’Òmi, ne coneishi pas ; los ahars, que coneishi. La mission civilizadora deus Estats Units, quan n’an ua, que’s limita per eth a : « La vòsta moneda que m’interèssa mentre que un Obama e assajava de har passar “ messatges ” ».

Lo metòde brutau deu president actuau que pòt embelinar los dirigents de las dictaturas miei-orientaus qui n’aiman pas de’s véder arcastar assassinats, suplicis de la còrda e autas lapidacions. A mens que las soas paraulas ne sian pas que batalejadas mès, dens aqueste cas, qu’arroïnarén un pauc mei lo crèdit qui’u demòra. Dab la part europèa deu son viatge, que seràn higas d’un aute tistèth e, qui ac sap, ua ajuda involontària entaus país qui aimarén d’avançar cap a ua integracion mei hòrta se, per cas, decideish de baishar d’ua faiçon significativa la participacion financèra a l’OTAN deus Estats-Units. Ne cau pas oblidar tanpauc l’entervista damb lo papa Francés qui, maugrat qu’aja pas nada division (militara), coma ac disèva Estalin, a ua influéncia de las granas gràcia au son magistèri. E, de segur, Francés ne mancarà pas de’u parlar de l’immigracion e de la situacion desesperada de milions d’Estatsunidencs privats de l’Obama care… Trump tocat per la gràcia, e’s pòt ?
 

Andriu de Gavaudan


Écrit par La Setmana le mercredi mai 31, 2017
Category: news - Tags: editorial, gavaudan, gascon, trump, politica, internacionau

« Uei, 6au rencontre de la Tuta d'Òc ambe Christian-Pierre Bedel - Ensenhament bilingüe — Acamp d'informacion a Moissac (82) »