Lo setmanièr occitan

Editorial : « Auturoses, los Franceses ? »

Encara un esfòrç e benlèu saurem contra qual nos cal votar… se votam ! Los sondatges multiples, relaiats a bodre pels mèdia, nos porgisson cada jorn una « fotografia de l’opinion a un moment m », çò dison ; e, sul fenestron, las canals d’informacion se sentisson obligadas d’« anar mai luènh amb lo dorsièr de l’eleccion », dorsièr aprigondit, de segur, que dura un parelh de minutas ! Fariá mestièr, qual sap, que recrutèsson un mèstre del suspense o un imitator del paure Léon Zitrone que comentava las eleccions coma lo Grand prèmi de Diana o d’America. Dins aquela corsa, avèm los faire-valer, los outsiders e las vedetas ; cal los uns e los autres per assegurar l’espectacle. E d’espectacle, n’avèm… desempuèi tres o quatre meses. Encara un esfòrç e poirem far rampèl als Estats-Units, « lo far de l’univèrs liure » (Fulbèrt Cant) venguts ara, amb l’administracion novèla, lo país dels faches alternatius (alternative facts) e de las novèlas inventadas (fake news). Al moment qu’escrivi, son quatre que retenon l’atencion dels especialistas, mas amb una suspresa de talha : la desbandada del candidat PS e lo vam inesperat del candidat de l’extrèma esquèrra. E demest aqueles quatre, n’i a pas qu’un sol a se dire europèu ; los autres presican mai o mens per tornar a França son esplendor e son dardalhament perduts. Aparentament, nòstre pòble, vengut esclau e gaireben lobotomizat en causa de l’« eurocratalha » de Brussèlas, serà mai fòrt tot solet qu’ara quand es mal acompanhat ! Aurián oblidat totes çò que devèm a una Euròpa fargada, d’una faiçon fòrça imperfacha de segur, après los dos chaples mai grands de l’epòca modèrna ? O alara, lo fach de pensar que « sèm lo pòble mai aluserpit del planeta » nos empacha de nos acarar a las realitats. Qual a dich que los Franceses èran auturoses ?

Andriu de Gavaudan


Écrit par La Setmana le jeudi avril 13, 2017
Category: news - Tags: editorial, gavaudan, politica, eleccion, presidenciala

« Entrevista Yann Lespoux : « Nos fasèm pas d'illusions » - Òlt — L'amontanhatge, ua tradicion ancestrau primordiau tà l'environament »