Lo setmanièr occitan

Economia : Tolosa e Montpelhièr en plen creis.

Segon las chifras indicadas per la direccion regionala de la Banca de França, las donadas macro-economicas de la Region Occitània / Pirenèus-Mediterranèa son quasi totas al verd.

Maxime Mauroy, director regional de la BDF, a lo sorire. Per 2016, se constatèt un creis de 6,4 % de la chifra d'afars dins l'industria, 5 % dins los servicis e 2,5 % dins lo BTP. A aquò cal ajustar un fòrt creis democrafic, la creacion sostenguda de start up dins lo domeni de la recèrca. Als confraires de Midi Libre, lo sénher Mauroy a indicat que las doas metropòlis « constituisson de formidablas maquinas a crear de riquesa ». A aquò cal ajustar una pujada dels efectius dins lo sector industrial (+ 1,1% ), dels servicis (+ 4 %) o, de faiçon mai modèsta, dins los BTP (+0,1%).

Per çò qu'es de la bona santat del sector industrial, es portada essencialament per Airbus. Malgrat aquelas chifras positivas lo caumatge demòra naut mas, segon lo sénher Mauroy,  « la dinamica economica s'es revirada per de creacions netas d'emplecs largament superioras a la mejana nacionala ». Après lo « boom » economic constatat per 2016, lo director regional de la BDF prevei de tausses de creis mai pròches de la nòrma amb especialament un rebomb dins lo BTP amb un creis de 2,4 %. Prevei un taus similar pels servicis mas l'industria serà totjorn primièra amb un creis de 3,4 %.

 


Écrit par La Setmana le mercredi février 15, 2017
Category: news - Tags: Economia, Creis, Tolosa, Montpelhièr

« Bordèu : Novèla-Aquitània a votat son primièr budgèt - Jean-Guy Talamoni en visita en Occitània (AUDIO) »