Lo setmanièr occitan

Cultura : "Lo hussard sus lo teit" en occitan !

Es lo primièr filme long de ficcion doblat per l'associacion Conta'm. La sortida en DVD es prevista per la prima. (Fòto Hachette Première et Cie)

Aquel filme de Jean-Paul Rappeneau, adaptat del roman de Jean Giono (1951), sortiguèt dins las salas en 1995. Conta l'epopèia del coronèl dels ussards Angelo Pardi qu'a degut fugir son Piemont natal après aver tuat un oficièr austriac en duèl. Travèrsa la Provença de 1832 que patís una epidèmia de colerà. Lo realisator a fait part a la còla de Conta'm de son encantament respècte a aquela iniciativa. "L'a fòrça agradat que son filme siá doblat en occitan" çò nos a dit Ludovic Gillet, administrator de produccion.  

26 comedians mobilisats

Per doblar aquel filme long, Conta'm a investit dins de material novèl e mobilisat pas mens de 26 comedians. An jogat un total de 104 ròtles (dialògs e ambients) sus un relambi total de dètz jorns escampilhats entre octobre e decembre de 2015. Lo ròtle principal d'Angelo Pardi (interpretat per Olivier Martinez) foguèt fisat a Laurenç Labadia qu'assumís tanben la direccion artistica. Lo doblatge de l'eroïna Pauline de Théus (interpretada per Juliette Binoche) foguèt fisat a la girondina Delphine Lafon. Foguèt embauchat lo comedian italian Mario Peperoni (occitanofòne tanben !) per tornar escriure e jogar de dialògs en italian. Per la pichòta istòria, lo comedian clapassenc Brunò Cecilhon se deguèt doblar el-meteis puèi que faguèt de figuracion dins lo filme de Rappeneau... e poguèt jogar d'autres ròtles, segur.  

Lo produit acabat serà disponible en DVD per la prima. Una difusion de quinze jorns serà programada sus Oc Télé  al meteis periòde. Serà projectat pel public escolar e tanben a l'escasença de festenals. Conta'm e l'associacion Pixel'oc tornaràn far una formacion al doblatge ongan. Se debanarà en mai, sus dos jorns en Dordonha (per s'entraïnar) puèi sus dos jorns a l'estudiò de Pontac (64) en situacion. Per la sason 2016-2017, l'associacion Conta'm doblarà lo filme britanic " Paddington ". 


Écrit par La Setmana le jeudi janvier 14, 2016

« Lo debat sus la proposicion de lei Molac comença a l'Assemblada nacionala - País basc : los abertzales vòlon bastir un scenari de patz »