Lo setmanièr occitan

Cronica Curiós de Santat - Los plan·hèits de l’aleitada

La cultura de l’aleitada que’s pèrd per rasons divèrsas, maugrat estudis qui n’estableishen los plan·hèits tau mainatge.

Un còp qu’èi lejut lo jornau Causette, mensuau feminista. Un article que’m truquè mei que los autes pr’amor que coneishi drin lo subjècte, lo de l’aleitada. Aqueste article que parla deu personau de las maternitats qui obligarén, possarén las hemnas a aleitar. Ua mencion especiau que denoncia l’associacion La Leche League d’estar « ayatollahs » de l’aleitada, donc integristas. Aqueth discors que’m torna brembar lo d’Elisabeth Badinter, ua feminista de renom. Dens lo son libe « Le conflit, la femme et la mère » (Lo conflicte, la hemna e la mair, 2010) que critica maishantament los « crotzats » de l’aleitada, los feministas naturalistas. Duas responsas entad aquò. Un, lo personau medicau de las maternitats que manca dilhèu de delicatessa. Mes qu’an ua responsabilitat de santat publica, d’informar las hemnas suus avantatges indenegables de l’aleitada. Dus, que pensi que la dauna Badinter e s’engana de cibla. Ne serveish pas ad arren d’acusar çò qu’a previst la natura tà l’uman. La hemna qu’a lo don de balhar la vita e de produsir lèit entà neurir lo son mainat. Non caleré pas meilèu contestar l’organizacion de la societat, qui non permet pas a las hemnas de conciliar vita professionau e vita de mamà ?

Cultura perduda ?

Deu men costat, que denóncii las violéncias deu personau e deu sistèma medicau en generau sus las hemnas au moment de la vienguda d’un nin. Lo biaish de dirigir, de controlar la causida de las hemnas pendent aquestes moments hèra importants dens la vita de navèths pairs. Per exemple, ua hemna qui non pren pas la posicion dita ginecologica, que serà viste apitada dens la bona postura. Non pas explicar un gèste medicau pr’amor monde pensan que la mair non pòt pas lo compréner, qu’ei ua actitud de violéncia. Los protocòlles qu’empachan tota libertat en plaçar los professionaus dens rapòrts de fòrça dab los pairs o rapòrts condescendents, auturós. Los professionaus que deverén meilèu estar dens posicions de collaboracion dab los pairs, shens denigrar, shens jutjar las causidas. Cada paraula qu’ei preciosa dens aquestes moments. Atau en França, qu’avem perdut la cultura de l’aleitada.

Pr’amor tanben d’un periòde drin puritan que’ns arretrobam uei lo dia dab un environament familiau e sociau maishant tà l’aleitada. Qu’ei hèra mei dificile entà ua hemna de causir d’aleitar quan n’agi pas estat aleitada nina. Per exemple si l’aleitada ei plan admetuda, dinc a 2 o 3 mes, après 6 mes la mair que vad suspècta, e après 8 / 9 mes la mair que pòt recéber pressions entà deishar d’aleitar lo son nin. Las informacions que deverén atau estar mei frequentas. E sabetz que l’Organizacion Mondiau de la Santat e ditz que l’aleitada exclusiva e puish perdurar de cap taus seis mes deu nin ? En França, la durada mejana d’ua aleitada qu’ei de dètz setmanas.

La Leche League

Tà çò de l’associacion de la Leche League, qu’ei ua associacion mondiau de mairs benevòlas qui an ua grana experiéncia de l’aleitada. Suu lor site Internet que trobaratz articles interessants dab totas las referéncias scientificas qui cau. Si voletz informacions e sostien entà ua aleitada, qu’ei la hont la mei pròcha e hidabla en França. Quan los mètges e los pediatres n’agin pas sonque quauques òras de formacion suu subjècte, las personas de la Leche League qu’an mantuas òras de formacion cada an, après ua formacion iniciau d’un an en companhonatge en mei de la lor pròpia experiéncia.

Avantatges a tèrmi brac e long

Los estudis scientifics suus avantatges de l’aleitada non son pas navèras mes que son mei numerosas e precisas aquestas darrèras annadas. Uei lo dia qu’i a ua pièla d’estudis « randomizats » controlats qui prenen en compte l’exclusivitat de l’aleitada, e la durada.

Que son concordantas tà díser los plan·hèits de l’aleitada. Que pertòcan principaument la santat deu nin e de la mair. Mei nau, la psicologia tanben que comença a véder los efèits positius de l’aleitada suus nins. Los avantatges a tèrmi brac que son los mei coneishuts deu còs medicau e deu gran public e los mei documentats. La lèit mairau qu’ei bona entaus anticòs de la mair transmetuts au son nin. Los estudis que son numerós e balhan totas las medishas conclusions : la mortalitat e morbiditat (donc las malaudias) que son mei baishas entà mainats aleitats.

Qu’abòrdi ací un aspècte mei complèxe e mei debatut. Lo còs medicau qu’ei prèst a reconéisher lo ròtle anti-infecciós de la lèit mairau, mes e trebucan a adméter qui l’aleitada posca har un vertadèr plan·hèit entà la santat deu mainat e de l’adulte. Per exemple las otitis a repeticion que pòden domatjar l’audicion. Quan sabem que l’aleitada e reduseish las otitis, que vad evident que la populacion de mainats aleitats e averà un melhora audicion qu’ua populacion de mainats neurits au beveron.

Los estudis qui pròvan los plan·hèits de l’aleitada a tèrmi long, que son de mei en mei numerosas ja que sian maishantas a miar. Que pertòcan las allergias, l’alimentacion deu cervèth, la prevencion de l’obesitat, l’apendiciti, l’escleròsi en placas, lo diabèti, los càncers, la maturacion sexuau, lo desvolopament deus glapitars e la santat cardiovascular futura.


CECÍLIA MESPLES


Écrit par La Setmana le lundi mai 29, 2017
Category: news - Tags: santat, mainatge, leit, popa

« Forom de las Lengas (31) — Palanca enter las lengas deu monde sancèr - Corsega - Ua carta locau a l'emplec que hè polemica »