Lo setmanièr occitan

Corsega - Ua carta locau a l'emplec que hè polemica

Ua carta locau de recrutament que hè polemica en Corsega. Qu'engatja los sons signataris (organismes professionaus e sindicaus) a favorizar lo desvolopament deu marcat de l'emplec locau.

Atau, las formacions professionaus que seràn adaptadas aus besonhs, la lenga còrsa que serà valorizada com critèri de recrutament e la prioritat que serà balhada a l'embaucha deus Còrses e residents de l'Isla de beutat.

La carta qu'estó signada lo 24 de mai per presidents de las Crambas deus mestièrs, deu comèrci e de l'agricultura, atau com peu Sindicat deus Tribalhaires còrses (STC). Lo president de l'Assemblada de Corsega, Jean-Guy Talamoni (Fòto LS), que declarè : « Qu'ei ua purmèra etapa. La carta qu'averà un caractèr constrenhent quan hàcia l'objècte de protocòles signats enter las enterpresas e los sindicats ».

Lo prefècte de la region Corsega, Bernard Schmeltz, qu'avèva previenut, au començar deu mes de mai, qu'aqueth tipe de disposicion poderé estar « constitutiva de l'infraccion de discriminacion a l'embaucha » e que las enterpresas qui ac acceptarén e's hicarén dens ua situacion de grana insecuritat juridica. Lo sénher Talamoni que prenó aquera mesa en guarda com ua « temptativa d'intimidacion hèra grava ».

L'objectiu que demora totun de baishar lo caumatge de l'isla qui compta uei lo dia mei de 22 320 demandaires d'emplecs.


Écrit par La Setmana le lundi mai 29, 2017
Category: news - Tags: corsega, lenga, cultura, corse, tribalh, enterpresa, sindicat, talamoni

« Cronica Curiós de Santat - Los plan·hèits de l’aleitada - #2017OC - Arron la Presidenciau, qu'interpèlan los candidats a las Legislativas »