Lo setmanièr occitan

Collègi : cossí la reforma desorganisa l'ensenhament de l'occitan.

Fins ara, un mainatge arribant al collègi podiá far d'occitan ... Ne calrà lèu-lèu parlar al passat ? Es possible, compte tengut de las novèlas qu'arriban del terren e de las consequéncias concrètas de la reforma del collègi.

Nos sèm procurats un document de sintèsi elaborat per la Federacion dels Ensenhaires de Lenga e de Cultura d'Òc (FELCO). Es una enquèsta menada al mes d'octobre al prèp d'ensenhaires sus la reforma. Dempuèi malgrat d'unas concessions obtengudas, la situacion es totjorn tan delicata sul terren. 

L'actitud de la carrièra de Grenelle respècte a l'ensenhament de l'occitan al collègi se poiriá resumir en un mot : « desorganisacion ». La FELCO mandèt un questionari als ensenhaires de las uèit acadèmias pertocadas. Tocava a las supressions d'oras o d'opcion ; de remarcas faitas en Conselh d'Administracion sus las riscas de supression o de marginalisacion en seguida de la reforma ; las mesuras enfaciadas per far una plaça a la lenga dita regionala dins l'encastre de la reforma. Los 34 testimoniatges reculhits per la FELCO son aclapants.  Per la màger part, pòrtan sus una « preocupacion » o encara sus un « estrambòrd (rar) respècte a la reforma ».

Desinformacion e desmotivacion 
Lo document fa primièr estat d'una marrida informacion dels ensenhaires, repausant sus de « rumors » de corredor sens donadas seriosas de la part de la ierarquia. Aquò pòt èsser angoissant quand s'agís de saber quantas oras vos seràn atribuidas o, pièger, se auretz d'oras d'occitan a la dintrada que ven. Los quites caps d'establiments se dison « perplèxes » rapòrt a las informacions que recebon dels Rectorats concernits. Pasmens, dins las entrevistas qu'an los ensenhaires amb lor superior, lor es suggerit d'argumentar sus l'utilitat de l'occitan. « Per la màger part, los professors an lo sentiment de s'agotar fàcia a un principal qu'encoratja la performança en demandant als professors de recrutar mai » çò indica la FELCO. En causa d'aquela marrida informacion e de l'incertesa que ne resulta, los ensenhaires an de mai en mai de mal a se trobar de futurs escolans. Tot lo monde es pertocat : que siá los ensenhaires caminaires coma los titulars installats dempuèi un brieu dins lor establiment. « Lo trabalh pedagogic ne patís, çò indica la FELCO, los collègas se demandan quin interès se pòt donar a una matèria que risca de desaparéisser del jorn l'endeman dins lo collègi. Aquela desmotivacion ligada a la reforma e a las rumors que suscita desmotiva parents e enfants ».

Inadaptacion a la cultura «  d'entrepresa  »
Coma o avèm sovent soslinhat dins las nòstras colonas, lo professor d'occitan se deu totjorn tornar en VRP per justificar sa preséncia. Se deu d'innovar, d'inventar e elaborar de percors pedagogics pertinents en collaboracion amb los collègas. D'unes testimoniatges positius de professors fan estat d'una bona integracion dins los conselhs pedagogics « per anticipar la pèrda d'oraris de l'opcion facultativa ». Segon lo document de la FELCO, i aguèron ja d'unas proposicions d'ensenhaments interdisciplinaris fòrça creatius : Occitan-Fisica ; Occitan-Musica o encara Occitan-Espòrt. Levat que «  l'interdisciplinaritat es pas correnta dins un mitan professional que s'individualisa de mai en mai  » çò ditz la federacion d'ensenhaires d'occitan. D'autres son clarament preses de cort : «  D'unes professors, destabilisats per aquesta logica de '  management  ' d'entrepresa, confessan qu'an pas lo temps o la creativitat necessària per salvar lor ensenhament linguistica. Sabon pas cossí integrar un EPI [Ensenhament Practic Interdisciplinari, NDR] puèi qu'aqueste sistèma fa pas partida de lor formacion iniciala nimai de las espròvas del lor concors (sic)  ».

Cap a mai de precarisacion
En s'apiejant sus las conclusions d'aquel document, s'agís pas unicament d'una perturbacion del bon foncionament de l'ensenhament de la lenga nòstra. S'agís clarament d'una acceleracion de sa precarisacion.  Quitament se d'unes ensenhaires pertocats se sabon adaptar «  an consciéncia que lo reciclatge [sic] en EPI basta pas per ensenhar la lenga dins la continuitat e mantenir son ensenhament  ». Las questions e remarcas transmesas a la FELCO demòran sens responsa «  puèi que la reforma i sap pas respondre e ignora las condicions d'estructuracion de l'ensenhament de l'occitan, coma sembla ignorar las questions organisacionalas dels emplecs del temps e servicis  ». La mesa en concurréncia entre opcions, exacerbada especialament dins l'encastre de la Lenga Viva 2 (LV2), risca clarament de daissar d'ensenhaires de caire, dins la postura desagradiva de pas poder complir lor volum d'oras de servici. Ven pas mai necessària una lei per las lengas ditas regionalas. Ara ven urgenta.

Clamenç Pech 

Un exemple de testimoniatge 

«  La principala del collègi ont asseguri cinc oras d'ensenhament opcional de la seisena a la tresena m'a demandat amb un grand sorire se mon Inspector Pedagogic Regional èra al corrent de l'avenir de l'opcion d'occitan dins las setmanas que venon. A ajustat qu'èra tot fresc e qu'als darrièrs escambis de corrics, los mejans especifics autrejats a l'ensenhament de l'occitan desapareisserián a la dintrada que ven. Davant mon aire estabosit a quitament ajustat que caliá pas comptar sus la Dotacion Orària Globala [DHG, volum orari atribuit als ensenhaments] pròpria a l'establiment per servar cinc oras, del mens pas tant. (...) Fàcia a aquel problèma ' d'empliment de las opcions ' es pas de bon prendre sus se-meteis e de sentir pas aquel problèma de nombre d'escolans coma un questionament de la competéncia del professor  ».

Inf. : Las consequéncias de la reforma del collègi per l'ensenhament de l'occitan farà l'objècte d'un dossièr central dins La Setmana n°1044 datada del 19 de febrièr. 


Écrit par La Setmana le jeudi février 4, 2016
Category: news - Tags: Ensenhament, Occitan, Collègi, FELCO

« Ensenhament : Ua mala d'animacion en alsacian - Gironda, Marna e Leire-Atlantic tocats peus pesticidas »