Lo setmanièr occitan

CINEMA : « L'Interès General ? Qu'es aquò ? »

Es a aquela question pro fosca que los realisators Sophie Metrich e Julien Melanesi ensajan de respondre pel lor documentari « L'intérêt général et moi » illustrat musicalament pel grop Artús. Lo filme « l'intérêt général et moi » (l'interès general e ieu) es en cors de pòst-produccion e deuriá sortir per la debuta de l'an que ven. Es mai un constat amar qu'un documentari.

Es a aquela question pro fosca que los realisators Sophie Metrich e Julien Melanesi ensajan de respondre pel lor documentari « L'intérêt général et moi » illustrat musicalament pel grop Artús. Lo filme « l'intérêt général et moi » (l'interès general e ieu) es en cors de pòst-produccion e deuriá sortir per la debuta de l'an que ven. Es mai un constat amar qu'un documentari. Es lo constat amar de dos opausants al projècte de l'A65 (entre Lengon e Pau) qu'an perduda la batèsta. Mas d'aquel fracàs ne vòlon tirar las leçons e ensajar de trobar una definicion pertinenta de çò que se ditz « l'interès general »... argument-maçuga sovent opausat als opausants a aqueles grands projèctes. Per aquò far, se son interessats a tres grandas infrastructuras en projècte : l'A65, la LGV Sud Oèst e tanben l'aeropòrt de Notre Dame des Landes, en Bretanha. Aquela nocion d'interès
general es pro fosca pr'amor càmbia d'un individú a l'autre. Sus una musica signada pel grop bearnés Artús, los cineastas Sophie Metrich e Julien Melanesi se son esforçats de cavar aquel questionament primièr en anant veire de monde dels dos costats. Los uns comprenon pas perqué deurián daissar lor ostal per daissar passar lo tren e daissar passar de personas « que vòlon ganhar 15 minutas sus lor trajècte » (sic). Los autres afortisson qu'aquelas infrastructuras anticipan los besonhs en transpòrt de deman. Aquel documentari s'interròga doncas sul biais que las politicas publicas son menadas. Es que son menadas en favor del ben comun o contra la volontat dels ciutadans maldespièit lo bon sens ? Lo filme cèrca tanben a demostrar cossí de monde sens granda experiéncia militanta capitan a s'organisar e a mobilisar lor coneissença del lòc que defendon. « Venon a lor torn d'expèrts e pòdon prepausar de concepcions diferentas de l'interès general » çò precisan los realisators. Per Sophie Metrich, co-realisatora, s'agissiá primièr de daissar una traça mercés a aquel documentari, una traça de çò patit per aquel país, a començar per Landas d'ont es originària.

La Setmana — Parlatz de daissar una traça de « l'ofensa patida » pels estatjants dels païses pertocats per aquelas infrastructuras. Es una ofensa de quin òrdre ?
Sophie Metrich — Es l'ofensa patida pels ciutadans en causa d'una decision politica d'Estat. Aquela nocion del sembla « interès general » torna tombar sul suc dels ciutadans fin-finala. An pas demandat aquela mena d'infrastructura, n'an pas de besonh. Pasmens patisson la destruccion d'un territòri. Nosautres avèm tanben sentida l'ofensa faita al ciutadan que se ne pren pas en compte lo vejaire.

LS — Al cors del documentari, un elegit explica que l'interès general d'uèi es pas forçadament lo meteis que l'interès general dins vint ans. L'interès general seriá lo besonh d'una majoritat d'agents economics ?
SM — Non, justament. Un autre intervenent explica dins lo filme que l'interès general deu pas consistir en la dictatura del nombre. Se s'agís d'una majoritat de monde que son pas al corrent de l'impacte de l'una o l'autra infrastructura, aquò balha una majoritat de monde que son per sens saber perqué. Cal viure sus un territòri per saber de qué òm a de besonh sus un territòri. Aquò demòra una nocion complicada, es per aquò que n'avèm fait un filme (rire) ! La nocion d'interès general es plurala segon lo punt de vista dins lo qual nos plaçam. Mas avèm la sensacion de quicòm que nos tomba dessús, coma un d'aquò's neblós que degun ne compren pas la substància. Deu èstre l'emanacion de çò que vòl la populacion
e avèm pas cap lo sentiment que va dins aquel sens. Avèm l'impression que l'aparelh d'Estat pren las decisions d'en naut sens francament sentir nimai conéisser los besonhs sul terren.

LS — Avètz l'impression que los ciutadans o los collectius pesan pas gaire fin-finala ?
SM — Òc, pesan pas gaire. [...] Amb Julien [Melanesi] avèm pres part al movement opausat a l'autorota A65. La batèsta foguèt perduda e lo filme es partit d'aquí. La sensacion qu'avèm agut es que lo nòstre vejaire èra pas cap pres en compte. Las associacions qu'an fòrça trabalhat los dossièrs, que ne coneissián plan los elements e que desvolopavan d'arguments aprigondits se son mainadas que los elegits locals avián eles pas coneissença de totes los elements del dossièr. (...) Es un problèma que la decision finala torne a de monde que coneisson pas plan de dossièrs tan complèxes. E prenon pas en compte lo vejaire de la populacion. Se ditz totjorn que defendon lor pèça d'òrt e lors interèsses pròpris. Quand avèm fait lo documentari, aviam en fàcia d'expèrts qu'avián plan trabalhat lo dossièr. Desvolopavan pas d'argumentaris en favor d'interèsses particulars mas puslèu en favor de çò que nosautres apelam l'interès general puèi que meton en balanç ecologia, biodiversitat, despensa publica e democracia, etc...

LS — Lo filme es en cors de finicion. Ont n'es exactament ?
SM — Aquí sèm dins la fasi de mesclatge e d'escandalhatge... Reglam la balança dels sons e de las colors. Deuriá èstre prèste per la mitat d'octobre. Una sortida nacionala en sala d'art e d'ensag es prevista per la debuta de 2016, en genièr o en febrièr. I aurà d'abans-primièras abans la sortida oficiala.

Entrevista Clamenç Pech

Inf. : Sophie Metrich e Julien Melanesi « L'intérêt général et moi » (autoproduccion, DHR, 2015). Sortida en sala prevista per 2016
Web : http://cooperativedhr.fr


Écrit par La Setmana le lundi septembre 14, 2015

« ESTER EN CHINA per Claudina Paul - Pertrèit — Emilia Roemer, Professora apassionada peus trobadors »