Lo setmanièr occitan

Catalonha : un sindicat denóncia la manca de promocion de l'occitan

L’occitan es oficial en Catalonha dempuèi 2006. E malgrat l’obligacion governamentala de l’ajudar en la sieuna promocion, a còps, aquò se debana pas coma çò indicat sul papièr.

Es çò qu’a volgut denonciar l’USPAC, l’Union Sindicala de la Polícia Autonomica de Catalonha. L’origina de la problematica es de balhar pas mai de ponches als foncionaris que parlan occitan. D’autras lengas pas oficialas, segon lo sindicat, rapòrtan mai de ponches dins la promocion foncionariala que non pas l’occitan. L’USPAC es un sindicat de la polícia catalana qu’a volgut denonciar, segon sos tèrmes, « lo mesprètz per la lenga occitana (aranés) que i a uèi en Catalonha ». Segon eles, lo govèrn independentista actual ne fariá pas pro per promocionar una lenga co-oficiala coma o es l’occitan en Catalonha. Segon aqueste sindicat, lo govèrn catalan pòt pas reconéisser l’oficialitat de l’occitan sens participar a sa promocion per facilitar son estudi, son aprendissatge e sa compreneson demest los ciutadans catalans.

Segon Josep Miquel Milagros, dins sas declaracions a La Setmana, « es normal lo sentiment de mala proteccion dels ciutadans catalans per çò que tòca a l’occitan pr’amor que lo govèrn actual mespresa aquela lenga. La valorizacion de la lenga occitana, oficiala dins tot lo territòri catalan, (o oblidem pas) es pas la meteissa qu’amb lo catalan. Aquò se pòt veire dins los concorses de promocion intèrna dels foncionaris ». Pr’aquò lo sindicat a volgut remembrar l’article 6 de l’Estatut d’Autonomia de Catalonha, que ditz : « la lenga occitana, apelada aranés en Aran, es la lenga pròpria d’aqueste territòri e es oficiala en Catalonha en acòrd amb çò que ditz aquesta lei e las leis de normalizacion lingüistica ».

L’interpretacion del sindicat es pas nòva. Segon la lei autonomica catalana, aver l’estatut de lenga oficiala vòl dire tanben que l’occitan es lenga de trabalh de la foncion publica. Aital, se un ciutadan o vòl, deu poder èsser aculhit en occitan. Dins lo cas de la polícia catalana, deu poder depausar de clams en occitan. Un fach que, segon aqueste sindicat, es pas la realitat a l’ora d’ara.

Una luta un pauc flaca

« Lo govèrn catalan luta pas pro per la recuperacion d’una lenga millenara coma l’occitan dins tot lo territòri catalan, çò diguèt lo pòrtavotz de l’USPAC, vòl pas que los foncionaris qu’an decidit d’estudiar e d’aprene una lenga tant anciana coma l’occitan siá una realitat. Son de foncionaris qu’an estudiat l’occitan pendent d’annadas. Ara veson coma los lors estudis son pas validats al meteis nivèl que lo catalan. Es una pietat e es totalament inacceptable ! ». L’incompreneson sindicala per la posicion governamentala catalana es doncas granda. Comprenon pas que lo govèrn balhe pas valor, riquesa a l’occitan e que lute pas pro per la promocion e recuperacion d’aquesta lenga. La denóncia de l’USPAC vòl soslinhar que lengas non oficialas coma lo rus, lo chinés o lo turc e lor mestresa balhan mai de ponches als foncionaris que non pas l’occitan. « Son de lengas estrangièras e alonhadas culturalament de Catalonha e qu’an pas l’estatut de lenga oficiala, çò diguèt Josep Miquel Milagros, e totas son mai valorizadas pel govèrn catalan que non pas l’occitan dins la sieuna varianta aranesa ».

L’USPAC a doncas volgut denonciar una situacion administrativa pas brica positiva per l’occitan en Catalonha. Segon eles, se es vertat que Catalonha a tanben l’occitan coma lenga oficiala, a pas d’èsser considerada coma una lenga de segonda categoria. A d’èsser reconeguda administrativament dins Catalonha tota e pas unicament dins la Val d’Aran, es un fach.

Cristian Andreu

Legenda fòto : L'Union Sindicala de la Polícia Autonomica catalana a denonciat lo « mesprètz » per la lenga occitana en Catalonha


Écrit par La Setmana le mardi avril 18, 2017
Category: news - Tags: occitan, lenga, catalonha, andreu, oficialitat, cultura, sindicat

« Condes deu parçan baionés - Sent Seren (46) — Aumenatge a la poèta lemosina Marcela Delpastre »