Lo setmanièr occitan

Breton : actors de la lenga recompensats

La ceremonia deus Prizioù (prèmis en breton) que recompensa personas, associacions, enterpresas o institucions qui an marcat l’innovacion en lenga bretona. La 20au ceremonia que’s debanè lo 24 de març a Lannion e qu’estó co-organizada per France 3 Bretagne e l’Ofici Public de la Lenga Bretona. Los musicaires Yann Tiersen (Fòto) e Emilie Quinquis qu’obtienón lo prèmi d’artistas britofònes de l’annada. Que defenen la lenga capvath lo lor art. Que succedeishen a Romain Sponnagel, professor de musica.

L’associacion de doblatge en lenga bretona, Dizale, que recebó lo purmèr prèmi de las associacions. Brezhoneg e Brest (breton a Brèst), l’associacion qui promòu la lenga bretona a Brèst, e l’Amicau deus pompièrs de Rennes, qu’arribèn respectivament en dusau e tresau posicion.

Lo Conselh departamentau deu Finistèrra qu’ei laureat tà estar estat lo purmèr departament a adoptar un plan tà la lenga bretona (2016-2021). Tà çò qui ei de las enterpresas, lo parc ludo-educatiu de Vannes, Le Ker, sus l’istòria de la Bretanha, qu’ei laureat. L’artista Youn Kamm que recebó lo purmèr prèmi de l’àlbum cantat en breton tà « Youn Kamm et le bagad du bout du monde ».

Un prèmi d’aunor qu’estó decernit aus liceans de Diwan qui reclaman de poder passar las espròvas deu bachelierat en breton.  


Écrit par La Setmana le mardi avril 11, 2017
Category: news - Tags: bretanha, OPLB, artista, literatura, doblatge, lenga, regionau, breton

« Lo hestenau Xarnegu Eguna que torna - Cronica plantas d'aquí « Viatge dei plantas : de l'alhors a l'aicí… au fiu dei sègles » »