Lo setmanièr occitan

Bordèu : Novèla-Aquitània a votat son primièr budgèt

Lo 13 de febrièr, la novèla granda Region establiguèt sa fuèlha de rota amb un budgèt primitiu de 3,4 miliards d'euros. 

Las grandas prioritats de la Region son nombrosas. La primièra d'entre elas, pr'amor de l'actualitat, es l'agricultura e lo sector agro-alimentari en causa de l'epizootia de gripa aviària. Dos departaments de la Region son dins lo triò de cap dels departaments mai tocats per la malautiá. Lo president Alain Rousset a doncas suggerit de passar d'un modèl « de compensacion » a un modèl « d'innovacion ».

Per çò qu'es dels transpòrts (autre dossièr màger), los conselhièrs saludèron unanimament lo continuament de la renovacion de la reabilitacion de linhas viatjaires e FRET. Aquela unanimitat desapareguèt lèu quand s'agiguèt d'evocar la question de la linha Auloron-Bedós e subretot la LGV al sud de Bordèu. Al vòte final, çò conta lo jornal regional en linha Aquí !, lo CR a votat contra lo capítol tocant als transpòrts e prevesent lo finançament d'accions fonsièras en vista de la LGV. 

L'autre punt negre de la sesilha foguèt la quita gestion de la Region. L'oposicion soslinhèt especialament lo taus d'estalvi brut passat de 29 a 9,8 % o encara la capacitat de desendeutament passada a 8,2 annadas. L'elegit centrista Jean Dionis du Séjour (UDI) suggeriguèt a l'executiu d'adaptar l'investiment respècte a l'estalvi net. Yves Damécourt (LR) regretèt el de dotacions d'Estat encara pro bassas e denoncièt l'armonizacion fiscala de las cartas grisas e de la taxa suls produits petrolièrs que considèra coma una « pompa a dardenas ».

Las doas compausantas de l'oposicion regretan encara una manca de reflexion sus la reduccion de las còstas e las despensas de personal. Lo grop majoritari se defendèt en soslinhant que la granda Region es eissida de la fusion entre tres Regions dont l'una aviá d'excellentas resultas financièras, una autra de resultas corrèctas e una autra de resultas degalhadas (comprendre : la Region Peitau-Charanta). 


Écrit par La Setmana le mercredi février 15, 2017
Category: news - Tags: Politica, Budgèt, Novèla-Aquitània

« Marselha : Corsica Linea tira camin - Economia : Tolosa e Montpelhièr en plen creis. »