Lo setmanièr occitan

Bal Brotto-Lopez : la (bona) crisi d'adolescéncia

Fa ara quinze ans que lo duò format per Cyrille Brotto e Guillaume López se passeja pels emponts del monde tot. Per aquel aniversari, faràn de concèrts e un album amb l’Armonia municipala de Tornafuèlha (Garona-nauta).

Es en tota simplicitat qu’aquel duò, ara fòrça presat pel mitan del trad’, del fòlc e de la cançon a crebat l’uòu. Se debanèt lo 28 de mai de 2002 dins l’encastre del festenal Autan d’Òc, dins lo barri del pont de las Domaisèlas a Tolosa. Dempuèi, los dos musicians acaban pas de nos far partejar lor exploracion del repertòri tradicional... En fait, ne nos prepausan una extension larga en lo mesclant amb d’influéncias vesinas o alunhadas (geograficament) mas totjorn pròchas (musicalament). Faguèron tanben un bon nombre de composicions que se passejan plan dins las aurelhas coma suls emponts. Passèron per Occitània (segur) mas tanben pel nòrd de França, Belgica, Itàlia, Olanda, Espanha, Portugal, Estats-Units o encara Ucraïna. De faiçon logica, es en musica que los dos collègas celebraràn aqueles quinze ans amb la complicitat de l’Armonia municipala de Tornafuèlha (Garona-nauta). Aquela orquèstra de musicians amators es dirigida dempuèi 1980 per Claude Puysségur qu’a totjorn agut coma filosofia de far se rencontrar de musicians amators e professionals. Aqueste es tanben professor a l’escòla de musica locala. A especialament ensenhat lo saxofòn a un cèrt... Guillaume López ! Lo jazzman Jean-Christophe Cholet assegurarà la ligason entre los 50 musicians de l’armonia e lo duò. Assegurèt la tasca dificila d’escriure e d’adobar la partida destinada a l’orquèstra.
Nos sèm demandats primièr cossí s’es pogut debanar aquel rencontre entre aqueles dos musicians que contribuisson a tornar actualizar en permanéncia la musica tradicionala. Abans de partir per las primièras repeticions amb los musicians de l’Armonia, Guillaume López a degut far trabalhar la memòria per nosautres.

La Setmana — Vos sovenètz del vòstre primièr rencontre amb Cyrille Brotto ?
Guillaume López —
Nos sèm rencontrats abans l’an 2000, mai o mens. Èrem convidats per Pascal Caumont que deviá montar un grop de balèti per un festenal tolosan. Ieu coneissiái plan lo Pascal, qu’èra professor de solfègi a Tornafuèlha. Me demandèt alara de venir far un bal amb el e qu’aviá trobat un acordeonista, en l’occurréncia Cyrille Brotto. Faguèrem atal lo nòstre primièr bal amassa, levat qu’èrem en triò amb Pascal. Atal a començat la nòstra istòria d’amistat. Pensi que per poder far 50 a 60 datas per an dempuèi quinze ans, cal que lo monde s’aprècien un pauc...

LS — A un moment donat, lo duò a fait una mena de « pausa ». De qué vos a botat a vos tornar metre a trabalhar amassa ?
GL —
D’aquel temps, èra en 2004, aviam enveja de far quicòm mai. Ieu aviái enveja de jogar amb mai de musicians e Cyrille voliá menar d’autres projèctes. Un an après aquela « pausa » nos tornèrem trobar sus un empont per far un buòu. Nos mainèrem qu’aviam talament d’automatismes, talament d’aisança per jogar amassa que nos caliá contunhar. Alavetz nos tornèrem organizar e una aventura novèla es nascuda.

LS — De qu’esperatz d’aquela creacion en companhiá de l’Armonia municipala de Tornafuèlha ? Una mena d’amplificacion del vòstre repertòri ?
GL —
Amb Cyrille, nos sèm renduts compte fa dos o tres ans que nos voliam servir de la nòstra basa musicala coma d’un carton d’invitacion a d’aventuras novèlas... coma quicòm a partejar. O faguèrem l’an passat amb los Ogres de Barback. Los Ogres son pas que sièis e per festejar los quinze ans, nos caliá un pauc mai de monde. Soi doncas tornat cap a mas experiéncias d’enfància, amb l’escòla de musica de Tornafuèlha ont foguèri escolan pendent quinze ans. Soi tornat dintrar en contacte amb mon ancian professor de saxofòn, Claude Puysségur, qu’es tanben lo director de l’orquèstra d’armonia de Tornafuèlha. Li ai prepausat de crosar lo son de l’armonia amb la musica de Brotto-López. Es pas de bon far pr’amor son de musicas plan distinctas. Ai doncas demandat a mon amic Jean-Christophe Cholet, pianista jazz e adobaire, de far totes los adobaments per aquel espectacle. Serà tanben amb nosautres al pianò per far de jazz. Nos passejarem entre tres univèrses musicals.

LS — Aurà tanben un ròtle de correja de transmission entre l’armonia e lo vòstre duò, sus l’empont ?
GL —
Sa plaça es primordiala pr’amor coneis melhor la musica del duò que l’Armonia (e quitament melhor que lo quite duò ! [rires]) pr’amor l’a escotada e analisada per la poder desvolopar per l’orquèstra. Amb Claude Puysségur, auràn a menar amassa un trabalh de direccion de l’Armonia, quitament s’es Claude que tendrà la bròca. Portarà tanben una color suplementària per d’improvizacions divèrsas.

LS — Aquela creacion es una mena de punt d’òrgue o alara volètz far durar lo duò lo mai longtemps que siá ?
GL —
Lo duò a doas tòcas a l’ora d’ara. La primièra es de far dançar coma o fasèm de mai en mai amb plaser dins Euròpa tota, per presentar la musica a dançar dels païses d’Òc. La segonda tòca es de prepausar una carta de visita per poder escambiar amb lo mai de monde que siá. Ongan, voliam vertadièrament marcar los quinze ans amb quicòm que sortiguèsse de l’ordinari, amb 50 musicians. En 2018, tornarem virar amb los Ogres de Barback. Avèm la volontat d’escambiar la nòstra musica amb lo mai de monde possible.

Entrevista Clamenç Pech

                                       

Inf. : lo 25 de mai a Aush (32), lo 3 de junh a Tornafuèlha (31) e lo 18 de junh a Moissac (82) ; un album es previst pel mes d’octobre. (Fòto Laurent Delfraissy)


Écrit par La Setmana le lundi mai 15, 2017
Category: news - Tags: brotto, lopez, musica

« Pertrèit de Damien Mooney — Un lingüista irlandés assetat d'occitan - Mèdias : Lo Jornalet a cinc ans ! »