Lo setmanièr occitan

Baiona la gascona

Com tot an, l'obertura de las hèstas de Baiona que's harà en lenga nosta. Augan, qu'ei Caroline Larbère, joena escartura de 28 ans qui declamarà dimèrcs ser lo famós Prosei en lenga occitana au balcon de la mairia baionesa davant milierat de personas. 

Que l'agrada a Caroline de partatjar la soa passion per las corsas landesas. Qu'èra au mes de mai passat, a l'escòla deu Sacré Coeur de Vilanava de Marsan (40) entà explicar las divèrsas facetas deu son mestièr. L'encontre dab los escolans que's debanè dens l'encastre deu projècte pedagogic Cultura gascon, miat en aliança dab la Federacion francesa de la course landesa. 

Pendent las hèstas de Baiona, lo dissabte 29 de julhet a comptar de 15 òras, l'Academia Gascona de Baiona-Ador que tienerà peu purmèr còp un estanquet gascon dens lo son locau (4 arrua deu Molin) a quauques mètres de la plaça Sent Esperit de Baiona au dret de la gara. Qu'ètz tots convidats a viéner minjar, béver, cantar o enqüèra pleitejar pendent las hèstas. 

Inf. : www.academiagascona.fr


Écrit par La Setmana le lundi juillet 24, 2017
Category: news - Tags: baiona, hesta, gascon, academia

« Literatura : Joasiana Ubaud nos porgís una reflexion sus l'estetica païsatgièra - Un empont mei e ua moneda pròpia a l'Estivada 2017 »