Lo setmanièr occitan

Auloron (64) — L'ACCOB que contunha la soa batalha contra las peirèras

Associacion tà la Conservacion deu quadre de vita a Auloron e au Bager (ACCOB) que s'apitè un an a, tà lutar contra las peirèras suus sites deu Bagèr, de Soeix o d'Escot. Despuish quauques dias, la soa branca aussalesa que's formè tà que los sons arriberans e estossen assabentats de çò qui's debana suu lor parçan. 

L'ACCOB qu'enviè un comunicat de premsa tà alertar lo monde : Lo 22 de març passat qu'estó vist ua nubla importanta de posca au dessús de la peirèra Laborde (au Bager d'Auloron). « Un huec deus importants vededer a mei d'un quilomètre deu lòc deu sinistre, mes non semblava pas d'origina accidentau puish a qu'ua pala mecanica l'alimentava a contunhar », çò escriu Jean-Claude Dutter, president de l'ACCOB dens lo comunicat. 

L'associacion que previenó las autoritats competentas. L'enterpresa qu'estanquè lo huec en recobrir las ehlamas de tonas de gravèr. Lo proprietari de l'enterpresa Laborde qu'evoquè un incident devut a un bidon d'esséncia qui s'auré « ahuecat per mauavisament ». Totun l'associacion bearnesa que ditz estar en possession de videos qui amuisharén qu'ei un acte deliberat. 

L'ACCOB que demanda que prelhevaments e analisis e sian realizats sus las substàncias cadudas en lo perimètre deu huec e aus entorns, tà que sanccions e sian presas : « Qu'avem hèit constatar aqueth estat de hèit per la gendarmeria d'Auloron Senta Maria. […] Aqueras substàncias que pòden aver consequéncias prejudiciablas de natura a hicar en dangèr la santat umana, a nòser a las ressorças biologicas e aus ecosistèmas ». 

L'ACCOB que portè l'ahar a la coneishença deu Prefècte deus Pirenèus-Atlantics e que portè lo clam au près deu Procuraire de la Republica. A l'òra quan escrivem aquera braca, l'enterpresa Laborde n'a tostemps pas reagit cap au clam portat per l'associacion. 

Lo 8 d'abriu, lo grop ACCOB format en Aussau tà deféner la seuva, los arrius, la biodiversitat e contra los projèctes de peirèras dens la seuva deu Bager, d'Auloron e de Soeix, qu'organizè un acamp d'informacion.  Un trentenat de simpatizants que responó a l'aperet e que's balhèn rendetz-ve au virolet enter Izeste e Arudi. Que distribuín paperòts e qu'installèn un taulèr entà informar los arriberans. 

                                      

Claude Aussant, lo maire d'Arudi que's juntè a la manifestacion. L'elegit qu'auré un avís trencat sus la question de la creacion de peirèras, « la màger part deus elegits aussalés que son opausats ad aqueras peirèras, autant au nivèu de las comunas com au bèth miei de l'intercomunalitat », çò hidè ua de las animatoras aus jornalistas presents sus plaça. 

                                     

L'ACCOB aussalesa que compta 25 membres, l'ACCOB, 350 aderents. L'associacion qu'ei en conflicte dab la mairia d'Auloron. Aquera que's ditz obèrta a tota discutida tà la creacion d'ua peirèra dens la seuva deu Baget. Un estudi de factibilitat qu'estó lançat en 2015 per la vila d'Auloron tau projècte shens n'informar los arriberans. Hervé Lucbéreilh, lo maire d'Auloron e quate autas personas de la mairia que portèn lo clam contra ACCOB. Ahar de seguir. 

Inf. : www.foret-bager.fr — Fòtos ACCOB


Écrit par La Setmana le mercredi avril 12, 2017
Category: news - Tags: peirera, environament, industria, aussau, bearn, accob, arudi

« Somari de La Setmana n° 1074 - Lo hestenau Xarnegu Eguna que torna »