Lo setmanièr occitan

Arudi — Los Castellers que tornan en Vath d'Aussau

L'istòria deus castellers catalans a Arudi que comencè dens las annadas 2000 dab dus joens Catalans de Barcelona qui vienón apréner l'occitan en Bearn. Estacats e curiós de la lenga e de la cultura nostas, Toni e Jordi que multiplican despuish los viatges enter Bearn e Catalonha. Jordi qu'aubrí ua tavèrna occitana a Barcelona, aperada « Lo Joan Petit », on se podèva tastar las especialitats deu parçan occitan com lo vin de Juranson e minjar hromatge d'aulha de Sevinhac. Pendent un viatge en tèrras catalanas, Bearnés que hasón la descobèrta deus « Castells », castèths umans dont lo ciment qu'ei lo grop aperat « la colla ». Lo castèth que s'acaba dab l' « enxaneta », un mainat qui puja dinc au som de la montanha umana en musica. Esmiraglats per la beutat de l'espectacle, los Bearnés que decidín de har viéner los castellers tà Bearn. Mercés a ligams dab la Calandreta deu Lis e la mairia d'Arudi, lo saunei que vadó realitat.

En agost de 2014, Arudi qu'arcuelhó 140 castellers catalans de la vila de Gràcia (lo grop deu famós Jordi). Cap a 1500 curiós que vienón descobrir aquera tradicion catalana.

L'eveniment qu'estó ua tau escaduda que tornarà deu 23 au 25 de junh, dab ua navèra « colla » de castellers, los Castellers del Poble Sec (castellersdelpoblesec.cat). Dissabte matin, lo grop que harà ua demostracion braca a Laruntz e lo mieidia, demostracion e aperitiu auhèrt per la mairia d'Arudi, seguit d'un passacarrèra dab los acordeons de Lis e los castellers. Lo vrèspe, grana representacion a l'estadi d'Arudi.

L'endedia, pujada a la laca de Biós Artigas tà ua descobèrta d'un endret meravilhós de la vath d'Aussau.

Jean-Paul Casaubon, president de la Comunautat de Comunas de la Vath d'Aussau, que sostien aqueth eveniment qui demòstra « l'obertura cap aus territòris vesins ». « Aqueras piramidas umanas qu'atiraràn de segur la curiositat de nombrós espectators e permeterà de descobrir ua tradicion inscriuta au patrimòni culturau immateriau de l'umanitat de l'UNESCO, e qui partatja valors hòrtas com l'enterajuda, lo partatge e la hidança », çò escrivó dens ua letra de sostien.

Tà poder renovelà l'eveniment lo mei sovent com possible, los organizators que hèn aperet a la vòsta generositat e au vòste sostien, que cèrcan benevòles. Entresenhas mei sus www.occat.org

Vistedit que serà sus plaça dab un taulèr reservat a las nostas darrèras publicacions de Papagai e La Setmana, las nostas bendas d'imatges, libes e aus DVD navèths en divèrs parlars occitans de l'associacion Conta'm com Paddington e Trotet ! Ça-vietz numerós !

                              


Écrit par La Setmana le mercredi juin 21, 2017
Category: news - Tags: castellers, calandreta, ensenhament, lenga, cultura, lis, bearn, catalonha

« Los 5 ans deu Jornalet au CIRDÒC (Audio) - Somari de La Setmana n° 1079 »