Lo setmanièr occitan

Acamp gara Pau — Non tòques pas a la mea Paloma Blua

A la fin deu mes de heurèr de 2016, l’Estat qu’anonciè lo son desengatjament cap au financement deus Trens d’Equilibri deu Territòri (TET) e mei que mei deus trens de nueit. « Ne responen pas mei de manièra satisfasenta a las atentas deus viatjadors, a l’encòp en tèrmi de servicis com de qualitat de servici », çò digó Alain Vidalies, secretari d’Estat aus Transpòrts au moment de l’anóncia oficiau. A tèrmi, duas linhas París-Briançon e París-Rodés/La Tor de Querol (Catalonha-nòrd) que demoraràn en activitat. Duas autas linhas, París-Tarba, Hendàia (Paloma Blua) e París-Niça que son en espèra. París-Tarba-Hendàia que contunharà a arcuélher los viatjadors dinc au mes de julhet de 2017 quan lo tren París-Niça e sia espleitat dinc a la fin de la sason estivenca de 2017.

Lo Collectiu « Oui au train de nuit » que s’apitè entà sauvar aqueths trens istorics. Creat au printemps de 2016, lo collectiu qu’a uei lo dia un quinzenat de relais en Catalonha-nòrd, en Pirenèus-Atlantics, Pirenèus-Hauts, Tarn, Gironda, PACA e Ròse-Aups.
Ger ser, lo collectiu qu’organizè ua navèra manifestacion en gara de Pau (64)  en aliança dab las sessions CGT-emplegats ferroviaris de Baiona, Hendàia, Tarba, País de Comenge e Pau, on lo passatge deu famós tren, la Paloma Blua, ei miaçat. Los organizators qu’estón victimas deu lor succès : cap a 200 personas que vienón participar a l’acamp. Los escambis que’s debanèn dens ua sala au ras de la gara de Pau. La mitat de las personas que demorèn a l’exterior. Militants EELV, PCF e de la France Insoumise que sostienón la causa.

                        

Frederic Puntous, secretari de la CGT-emplegats ferroviaris de Pau, que denóncia la mesa en venta tardiva de las plaças per la Paloma Blua, « Monde ací que’n pòden testimoniar, qu’arriba que los trens e circulen shens nada mesa en venta deus tiquets ». Tà l’argument deu govèrn qui ei de díser que lo taus de frequentacion ei en baisha, lo sénher Puntous que respon : « Los trens de nuit, qu’ei 86 % de pleatge pendent las vacances d’estiu. […] Quitament a París, nombrosas que son las escòlas qui s’estiman mei préner los trens de nueit tà viatges escolars, tà non pas pagar ua nueit d’ostaleria. Qué haràn aqueras escòlas shens eths ? ».

L’estrategia financèra de l’Estat e de la SNCF qu’estó lo subjècte màger deus escambis. « La LGV qui arriba a Bordèu en julhet e seré un mejan de substitucion aus trens de nueit ? Qu’ei faus ! Que serà mei car, los oraris n’interessan pas los usatgèrs deus trens de nueit e qu’ei mensh ecologic ». Los militants que denóncian un peatge 30 % mei car que non pas taus autes trens, çò qui aumentarà lo prètz deus bilhets LGV.  
Pierre Laurent (Fòto LS), lo secretari nacionau deu PCF que prenó la paraula entà denonciar la supression de la linha istorica : « Qu’ei ua vergonha pertocant aus services publics e deu punt de vista ecologic ».

                       

L’acamp que s’acabè dab los militants qui anèn arcuélher la Paloma Blua deu ser en gara de Pau dab bandaròlas e drapèus dab las inscripcions « Non tòques pas a la mea Paloma » e « Tots amassa dab la Paloma Blua ».

La Setmana qu'arcuelhó los testimoniatges de Robert Bareille, elegit a Auloron Senta-Maria e candidat a las legislativas sus la 4au circonscription tau PCF Front de Gauche e deu secretariat generau de Béarn Adour Pyrénées, ua association qui amassa socio-professionaus e politics de tots los partits e qui milita tà l'amelhorança de las infrastructuras dens la region. (Fòtos ©La Setmana)


Écrit par La Setmana le samedi avril 15, 2017
Category: news - Tags: sncf, bearn, transport, tren, nueit, paloma, cgt, ferroviari

« Rentrada 2017 — L'Ikastola que s'installa a Bocau (64), Calandreta que passa a costat deu projècte - Barradura d'usina — Los salariats de l'enterpresa Yara en cauma a Pardias (64) »