Lo setmanièr occitan

#2017OC - Arron la Presidenciau, qu'interpèlan los candidats a las Legislativas

Arron la campanha presidenciau, las estructuras amassadas dens lo projècte « 2017oc » que's viran cap aus candidats de las legislativas deus 11 e 18 de junh qui arriban. Los deputats de la navèra Assemblada Nacionau que seràn elejuts.

Suu site 2017oc.fr que podetz descobrir las responsas d'uns candidats per departament e per circonscripcion. Que pòden sia respóner au questionari sus 7 tematicas dont la politica lingüistica, l'ensenhament e lo patrimòni, sia deishar un comentari dens l'espaci que'us ei reservat.

Los iniciators deu projècte 2017oc que's disen satisfèits deu caminament hèit pendent la Presidenciau. Pas mensh de 7 candidats que responón au questionari, quan Marine Le Pen, François Fillon, Nathalie Arthaud e François Asselineau e causín de demorar silenciós.

A maugrat de la lor decepcion fàcia au feble relais de l'informacion suus hialats sociaus pendent la campanha, 2017oc que torna e qu'espèra interpellar lo mei de candidats possible tà obrir lo debat sus las lengas ditas regionaus. « L'enjòc qu'ei que la lenga e la cultura nostas e vàdia un subjècte de societat com un aute. Que cau que lo monde agin ua presa de consciéncia e se sentin pertocats. Que cau har pedagogia dab los elegits e díser qu'existeishem. N'i avèva pas arren abans, nada manifestacion... qu'ei important qu'i avosse quauquarren atau pendent la campanha pr'amor qu'ei un temps d'escota e lo monde que son mei atentius », çò digó Joan-Breç Brana deu CFPO Aquitania, l'un deus administrators e iniciators deu site, aus jornalistas de Ràdio País.

Que convida lo monde interessats a presentà's, a encontrar e entercalhar los candidats en trobar « elements de lengatge » tà cada partit, pertocant au progrès, a la tradicion, a l'obertura aus autes, per exemple. « Lo questionari 2017oc qu'ei hèra obèrt justament, que'n cau profieitar, pr'amor totas las sensibilitats que pòden estar representadas », çò expliquè.
Aver ua traça escrivuda deu sentit deus elegits suu subjècte de las lengas ditas regionaus que pòt estar un avantatge segon lo Bearnés :  « qu'ei miélher qu'arren. Emmanuel Macron, Benoît Hamon, Jean-Luc Mélenchon... aquiu que sabem çò qu'an dit, qu'ei escriut negre sus blanc ! », çò concludí.

Inf. : www.2017oc.fr


Écrit par La Setmana le lundi mai 29, 2017
Category: news - Tags: politica, legislativas, 2017oc, brana, cultura, lenga, occitan, candidats

« Corsega - Ua carta locau a l'emplec que hè polemica - Somari de La Setmana n° 1077 »