Lo setmanièr occitan

19 e 20 de mai — Lo Bearn e Hestiv'Òc que s'afican en capitala

La purmèra edicion qu'èra estada repossada l'an passat en rason deus atemptats, mes aqueste còp, qu'ei partit, Accents du Sud que puja tà París. Los 19 e 20 de mai, « l'art de víver a la bearnesa » que s'estangarà en la capitala. Musica, dança, lenga, literatura, gastronomia, tots los atrèits toristics deu Bearn que seràn amassats a la Bellevilloise, lòc parisenc de cultura. Un espaci torisme qu'arcuelherà los nombrós partenariats de l'eveniment. Divèrs artisans bearnés, o installats en tèrras bearnesas, agricultors, cosinèrs, representants de sites patrimoniaus que perpausaràn çò que lo Bearn e pòt aver de mei preciós. « Qu'i vau tà véner los mens guits, mes tanben tà deféner las meas valors, qui son las medishas que las d'Hestiv'Òc. Qu'èi tanben enveja d'encoratjar la futura generacion a minjar de com cau », çò hidè Jean-Luc, agricultor de 46 ans basat a Las Claverias (64) qui serà au salon.  
Lo Comitat departamentau deu Tourisme Béarn Pays Basque que participa a l'eveniment. 
Divés lo 19, Pierre Salles, qui presenta la cronica « Les mots d'Òc » sus France Bleu en la quau liga la lenga nosta e lo francés tà rénder la cultura locau accessibla a tots, que harà tanben partida de l'aventura Hestiv'Òc a País. Qu'animarà lo talhèr lingüistic « Professions ancianas e noms de familha ». L'endedia, que harà ua conferéncia sus « compréner los noms pròpis deu sud-oèst : apròchi istoric e lingüistic de la patronimia bearnesa e gascona ». Pierre e Alexandre Saubot que haràn ua presentacion sus « la cultura dens l'enterpresa ». 
Originalitat deus dus dias, l'aviada d'un « Party Bus » (en bearnés dens lo tèxte) capvath París tà la « Passejada Gormanda » a l'encontre deus Chefs bearnés Yves Camdeborde e Julien Duboué (sus reservacion).

Lo 20 de mai, talhèrs jòcs, degustacions e mercat deus productors tostemps a la Bellevilloise. Lo vrèspe que serà animat per espectacles de cantas e de danças. Un D'Òc Show especiau sus l'eveniment que serà filmat en dirècte de 15 ò 30 a 17 ò e retransmés sus octele.com. L'animator Silvan Carrère qu'arcuelherà actors culturaus qui participan ad aqueth Hestiv'Òc a París. 
L'Institut Occitan qu'organizarà ua prosejada a l'entorn deus « empronts deu francés a l'occitan » e Michel Feltin-Palas, « L'accent : un enjeu de pouvoir ». Los dus dias que s'acabaràn en musica, dab ua cantèra seguida de dus concèrts, André Minvielle e lo son Ti'Bal Tribal e Du Bartàs. 

Inf. : Associacion Accents du Sud, 8 arrua Paul Bert — 64000 Pau / Tel. : 05 59 90 34 94 — Mèl : contact@hestivoc.com / Site : www.hestivoc.com

                                            

Didier Fois, gavidaire d'Accents du Sud que'ns hidè la soa gaujor d'arcuélher los 55 partenariats dens l'aventura e tanben las soas esperanças tad aquera purmèra edicion : 


Écrit par La Setmana le jeudi mai 11, 2017
Category: news - Tags: hestivoc, paris, accents, sud, cultura, bearn, gastronomia, artisanat, agricultura, fois, pedehontaa

« Istòria : lo lion e lo leopard aquitans - L'Editorial de La Setmana : « Los quatre tèrces » »